नेकपा (एमाले)को निर्वाचन समीक्षा तथा पार्टी पुनर्गठन कार्यदलको बैठकमा संयोजक रामबहादुर थापा बादलले छुट्टै प्रतिवेदन प्रस्तुत गर्दैछन्।
यसअघि कार्यदलले अध्यक्ष केपी शर्मा ओलीलाई प्रतिवेदन बुझाइसकेको अवस्थामा बादलले आज बस्ने बैठकमा आफ्नो छुट्टै प्रतिवेदन प्रस्तुत गर्न लागेका हुन्।
सिंगो कार्यदलको प्रतिवेदन पार्टी महासचिव समेत रहेका शंकर पोखरेलले तयार पारेका थिए।
उक्त प्रतिवेदनमा निर्वाचन समीक्षाभन्दा बढी अध्यक्षलाई हटाउने गरी पुनर्गठनको आधार बनाउने कोशिस भएको बादलले आफ्नो प्रतिवेदनमा लेखेका छन्।
भदौ २३ र २४ को घटनाक्रम, भदौ २०,२१ र २२ गते गोदावरीमा सम्पन्न दोस्रो विधान महाधिवेशनको निष्कर्ष, असोजमा भनिमण्डलमा बसेको केन्द्रीय कमिटी बैठक, मंसिर २७ देखि पुस ३ गतेसम्मको ११ औं राष्ट्रिय महाधिवेशनले विधान संशोध र नेतृत्व निर्माण सर्वसम्मतिमा पारित गरेको विषयलाई छाडेर फागुन २१ को निर्वाचनलाई छुट्टै र स्वतन्त्र घटनाका रूपमा विश्लेषण गरिएको भनेका छन्।
'त्यसमा पराजयको जिम्मेवार लोकतन्त्र विरोधी हमलावरको त कुरै छाडौं आन्तरिक समीक्षाको नाममा पनि संस्थागत रूपमा नभएर असान्दर्भिक ढंगले व्यक्तिगत रूपमा पार्टी अध्यक्षलाई मात्रै गराउने अभिप्राय पाइन्छ,' उनले भनेका छन्।
कार्यदलको गठनसँगै पुनर्गठन भनेको अध्यक्षलाई पदबाट विस्थापन गर्ने चर्चा, परिचर्चा र प्रचारवाजी व्यापक रूपमा हुनुले पार्टी पंक्ति र जनमानसमा भ्रम सिर्जना भएको पनि बादलले भनेका छन्।
'आजको परिवेश नितान्त भिन्न छ। पार्टीको मुख्य नेतृत्वले प्रतिक्रियावादी वा विदेशीका सामु घुँडा टेकेको, अनुचित र गलत साँठगाँठ गरेको, पार्टी महाधिवेशनको भावना र मर्मविपरीत काम गरेको, पार्टीको सफल सञ्चालन गर्न नसकेको, पार्टीको आधारभूत हित र चरित्र जगेर्ना गर्न नसकेको, देशभक्ति, सामाजिक न्याय र जनजीविकाको पक्षमा काम नगरेको वा सैद्धान्तिक, वैचारिक, नीतिगत र कार्यक्रमिक कुनै हिसाबले पनि नेतृत्व गर्न असफल र विस्थापनयोग्य रहेको भन्न आधार छैन,' उनले प्रतिवेदनमा उल्लेख गरेका छन्।
त्यसकारण अध्यक्षलाई विस्थापन गर्ने कोशिस व्यर्थ रहेको थापाले बताएका छन्।
'निष्कर्षमा भन्नु पर्दा पार्टीको एघारौं राष्ट्रिय महाधिवेशनबाट करिब ७५ प्रतिशत मतसहित निर्वाचित अध्यक्षलाई विस्थापन गर्ने कोशिस व्यर्थ छ । एउटा मात्र चुनावको विजय / पराजय नेतृत्वको दावी र बिस्थापनको लागि पर्याप्त कारण हुन सक्दैन,' उनको प्रतिवेदनमा उल्लेख छ।
पूर्णपाठः
-1746009348.jpg)
